გიტაცებთ თუ არა ინტერიერის დიზაინი და ამ სფეროზე წარმოდგენა გაქვთ თუ არა, საძინებელი ოთახის ინტერიერის მოწყობა, შესაძლოა, მაინც გამოწვევა აღმოჩნდეს, რადგან ავეჯი სწორად უნდა იყოს განლაგებული და ამასთანავე, იყოს მყუდრო და ფუნქციონალური. ჩვენ გთავაზობთ, რამდენიმე რჩევას, რომლებიც დაგეხმარებათ მაქსიმალურად შეძლოთ თქვენი საძინებლის დიზაინი თქვენს გემოვნებასა და ყოველდღიურ ცხოვრებას მოარგოთ.
ოთახის ფერები
ლამაზთან ერთად, საძინებელი უნდა იყოს დამამშვიდებელი, კომფორტული. ამ განცდას კი, სწორად შეხამებული ფერებიც უზრუნველჰყოფს. გამოიყენეთ ნეიტრალური ფერები, როგორიცაა თეთრი და კრემისფერი, ან ღია ლავანდისფერი და ღია ლურჯი. თუ თქვენი საყვარელი ფერები თამამი და მკვეთრია, სცადეთ ექსპერიმენტები სხვადასხვა საშუალებით და დაამატეთ ოთახის ფერს საინტერესო ფერთა პალიტრა. გაალამაზეთ ოთახი რამდენიმე პატარა ბალიშით, ფერადი ბუმბულის გადასაფარებლითა და ბამბის საბნით.
დარწმუნდით, რომ ოთახში გადაადგილება თავისუფლად შეგიძლიათ
თუ გსურთ, რომ თქვენი საძინებელი თქვენთვის განტვირთვასთან ასოცირდებოდეს, ყურადღება გაამახვილეთ ოთახში დიდი სივრცის შენარჩუნებაზე. შეეცადეთ, თავი აარიდოთ ზედმეტი ავეჯის შეძენას, რათა გადაადგილებაში ხელი არ შეგიშალოთ წიგნების კარადებმა თუ ყავის, სამუშაო მაგიდებმა. ეს განსაკუთრებით მნიშვნელოვანია, მაშინ, როცა პატარა საძინებელი გაქვთ. სივრცის დასაზოგად დაამზადეთ დამატებითი სათავსოები, რომლებიც საწოლის ქვეშ შეგიძლიათ განათავსოთ.
იფიქრეთ თქვენი ავეჯის ვიზუალურ წონაზე
მიუხედავად იმისა, რომ ავეჯის განლაგება შესანიშნავი გზაა იმის დასადგენად, არის თუ არა თქვენი საძინებელი გადატვირთული, ასევე, მნიშვნელოვანია ისიც, თუ როგორ გამოიყურება იგი. ავეჯს აქვს ვიზუალური წონა. მაგალითად, საწოლის მინიმალური ჩარჩო, ვერტიკალური პანელის გარეშე, ვიზუალურად უფრო მსუბუქი ჩანს, ვიდრე მსხვილი საწოლის ჩარჩო დიდი პანელით. პატარა საძინებლის იატაკის შემთხვევაში, შეარჩიეთ მინიმალისტური საწოლი და ტუმბო, ხოლო მაღალჭერიან საძინებელში, შეგიძლიათ სცადოთ დიდი საწოლი, მაღალი პანელით; კედელის დიდ, თავისუფალ ნაწილზე კი, სივრცის შესავსებად, ნახატი ან დიდი ზომის პრინტი გამოიყენოთ. ნებისმიერი ოთახის ვიზუალური ბალანსის დასაცავად, შესანიშნავი ხრიკია კედლის სარკე. მსუბუქ სარკეებს დიდი სივრცის ილუზიის შექმნა შეუძლიათ.
გაანაწილეთ ოთახში განათება
იმის ნაცვლად, რომ მხოლოდ საერთო განათებით და მაგიდის ლამფით შემოიფარგლოთ, კარგი იქნება, თუ საძინებელში განათების რამდენიმე განსხვავებულ წყაროს დაამონტაჟებთ. ნუ შეაჩერებთ არჩევანს დიდ ჭაღზე, უმჯობესია, მარტივი განათების წყაროები, როგორიცაა ჩაშენებული განათება, ზედა განათება, იატაკის ნათურები, საწოლის ნათურები, მაგიდის ნათურები, საკითხავი ნათურები, დიმერები და შანდლები.
რბილი აქსესუარები
ყველა საძინებელ ოთახს აქვს ერთი დიდი რბილი ავეჯი – საწოლი, რომელიც ოთახის განსაკუთრებული ელემენტია. იმისათვის, რომ ოთახის ყველა კუთხეს რბილი ვიზუალი ჰქონდეს, გამოიყენეთ ფანჯრის ფარდაგები, ბალიშები და ა.შ.
გახსოვდეთ ჭერი
ჭერი არის ყველაზე დიდი და სუფთა ზედაპირი თქვენს საძინებელში, რაც დამწყებ დიზაინერებს ავიწყდებათ. ჭერი არის უზარმაზარი გამოუყენებელი რესურსი ნებისმიერ ოთახში. თუ გსურთ, თქვენს საძინებელს განსაკუთრებული ელფერი შესძინოთ, მოხატეთ ან შეღებეთ ჭერი. თუ ელეგანტური იერის მიღწევა გსურთ, განიხილეთ ჩამოსხმული ჭერის დამზადების იდეაც.
არ დაივიწყოთ კუთხე
თქვენს საძინებელში დადებითი აურა უნდა იგრძნობოდეს, სადაც სრულყოფილ დასვენებას შეძლებთ. თუ ასეთი სივრცე უკვე გაქვთ და ეძებთ რაღაც უფრო მეტს, მოიწყვეთ პირადი კუთხე თქვენთვის, მაგალითად, სხვენი, ან უბრალოდ, ოთახის კუთხეში განათავსეთ ფანჯრის სავარძელი, კომფორტული სკამი, სადაც დამღლელი დღის შემდეგ განმარტოვდებით.
შეინარჩუნეთ ინდივიდუალური სტილი
საძინებლის დეკორაციის იდეებზე ფიქრისას, ფრთხილად იყავით, რათა საბოლოოდ არ მიიღოთ ისეთი საძინებელი, რომელიც თქვენს საჭიროებებს არ პასუხობს. დარწმუნდით, რომ ის მორგებული იქნება თქვენს ინტერესებსა და გემოვნებას. თუ გიყვართ რაიმე სპეციფიკური, იქნება ეს გამწვანება თუ საწოლის რბილი პანელი, აუცილებლად გაითვალისწინეთ ეს დეტალები იდეების ჩამოყალიბების პროცესში.
